ភ្នំពេញ៖ នៅវេលាម៉ោង ១០យប់នេះ សម្តេចអគ្គមហាសេនាបតីតេជោ ហ៊ុន សែន​ នាយករដ្ឋមន្រ្តីនៃព្រះរាជាណាចក្រកម្ពុជា​ នឹងដឹកនាំគណៈប្រតិភូកម្ពុជាទៅកាន់ទ្វីបអឺរ៉ុប ដើម្បីចូលរូមកិច្ចប្រជុំអាស៊ាន-អឺរ៉ុប នៅប្រទេសប៊ែលហ្សិក ព្រមទាំងទស្សនកិច្ចការងារនៅប្រទេសបារាំង។ បន្ថែមពីនេះ សម្តេចក៏នឹងអញ្ជើញចូលរួមកម្មវិធីសំណេះសំណាលជាមួយបងប្អូនខ្មែររស់នៅទ្វីបអឺរ៉ុប នៅល្ងាចថ្ងៃទី១២ ខែធ្នូ ឆ្នាំ២០២២ស្អែកនេះដែរ។ នេះបើតាមការបញ្ជាក់ឱ្យដឹងនៅលើបណ្តាញហ្វេសប៊ុកផ្លូវការរបស់សម្តេចតេជោ។

ដោយឡែក ចំពោះអ្វីដែលគួរឱ្យចាប់អារម្មណ៍លើការបង្ហោះនេះ គឺការឆ្លើយតបនឹងសំណួរក្នុងខំមិនរបស់យុវជនម្នាក់ដែលបានជូនពរសម្តេចតេជោ ព្រមទាំងសាកសួរថា តើសម្តេចគិតថាក្រុមណានឹងឈ្នះពានជើងឯកពិភពលោកឆ្នាំនេះ? សម្តេចតេជោបានឆ្លើយតបថា៖ "បាល់មូលចៅ! តែតាមការពិនិត្យបារាំងមានឱកាសច្រើនជាងគេ"។

គួរបញ្ជាក់ថា ជានិច្ចកាលគេតែងឃើញសម្តេចតេជោនាយករដ្ឋមន្រ្តីរមែងឆ្លើយតបនូវសំណួរនានាតាមរយៈការខំមិនលើហ្វេសប៊ុកសម្តេចជាញឹកញាប់ ដែលហាក់ស្តែងឱ្យឃើញពីភាពស្និទស្នាលជាប់ជាប្រចាំរបស់សម្តេចជាមួយប្រជាពលរដ្ឋទាំងអស់។

ពាក់ព័ន្ធនឹងព្រឹត្តិការណ៍ FIFA World Cup ឆ្នាំ២០២២ វិញ ក្រុមជម្រើសជាតិបារាំងជាក្រុមជើងឯកឆ្នាំ២០១៨ បានឡើងដល់វគ្គ ៤ក្រុមចុងក្រោយដោយត្រូវប៉ះក្រុមជម្រើសជាតិម៉ារ៉ុក ខណៈក្រុមជម្រើសជាតិអាហ្សង់ទីន ជួបជាមួយក្រុមជម្រើសជាតិក្រូអាត ដែលជាជើងឯករងឆ្នាំចាស់៕